Num 17 | MPS | STEP | Te Genuai Bidigo Mosesbolo e tama po walali,

a[Hi 9:4]

Numbers 17

Godigo Aron aga digi dąį ilai dao olama, te we bidibolo ola mani

1 Te Genuai Bidigo Mosesbolo e tama po walali, 2 “Te Israel dabebolo te 12 te tolasa bilibo dono mao po walao. Te deli deli hani wąį tobolu bidide sao. Tama nago deli deli tobolu bidigo nogi te deli deli donode asęao. 3 Tama Arongo nogi te Livai hanigo donode asęao. 4 Tama nosali nago te dono dabe sisinama, eno ugwa bede te Dąų Wali Bomai Po Munalubo Halobage pąde ena dage dali pąba sisinagaselama, po mibo pąde wialagalao. 5 Tama te bidi eno sa muani bidigo ni dagede te kulubi holaibao. Tama augwaligo koneaiba, te bidi te pris sę emainogo, eno sa muai te yabao po waibao. Tama eno te tama ebo kolesagago te Israel dabego penane paliaibao, te augwaligo nage dali wado yabo sunumi paliaibao, te augwaligo megi nage dali ebo tiwai egobeo,” Genuai Bidigo te po wai.

6 Tama te po Mosesgo Israel dabebolo pusubo si, te deli deli tobolu bidi dabego dono Mosesbolo mani. Te deli deli dono te deli deli hanigo dao, te 12 hani wąį usu nama, tama augwaligo Aron nogi asęai dono me te nogo si olama si dono dali muani. 7 Tama Mosesgo te dono dabe selama, te kontrak halobage pąde muani, te name ugwa be tomode.

8 Tama do Moses te ugwa be tomoba tula pali. Tama agai suali, te Aron nogi asęai te dono suali, te Livai hani magi elama muani, te donode te kulubi holama, plaua walama, du walai suali, te ni amon du walama, tama te ni du polo tau yai suali. 9 Tama Mosesgo te dono dabe sela pelama, buluba solama, te Israel dabebolo waseligi pali. Augwaligo sula silibo si, tama te tobolu bidi dabe augwa dono dabe ma sagasiyu tama yali.

10 Tama Genuai Bidigo Mosesbolo e tama po walali, “Te Arongo nogi asęai te dono selama, te ugwa be tomoba pelama, te kontrak halobage pąde mugi pao. Te aga tede munaluyu, te dwai kolesaga ebo we bidigo homu kolesaga elama konemainu ilaibao. Tama tego augwaligo penane paninama, tama augwaligo ena dali wado po me wagobeo. Tama eno augwali me elama isiligobeo,” wali. ^a 11 Teda tama Mosesgo te Genuai Bidigo walali po tiwai wali pelama tiali. 12 Mosesgo te sę ela silibo si, te Israel we bidigo agabolo e tama po walali, “Te mu tama, megi da, da dola silaibao. Megi da, da sese hagala silaibao. 13 Te da hani bidi me te Godigo ugwa be pąba pobadi me tagala. Teda Godigo aga elama isilaibao. Tama tibaso, da tigidali tama isaibao,” augwaligo te po wai.